" MIZTECH S. L. I. "

PREMIER COUPLET

On a intindu canté, souvint tous les inné
Eune n’chanchon d’Carneval su les gins débauché.
Mais ch’est eune aut’ affaire, su chés fimme marié,
Y font l’queue à leux hommes quand y s’in von ouvré.

REFRAIN

On porra n’in parlé, din tous chés grand cabaré (bis)
Deull’ vie de chel fimme marié.

DEUXIEME COUPLET

Ah ! Ch’est un grand malheur, quand on est marié,
D’avoir eune fimme comme cha quel peu poin s’in passé
Et ch’n’est poin pour un jour, ch’est pou l’éternité,
Car eull’ tache est trop grante pou povoir l’effacé.

TROISIEME COUPLET

Et ch’l’omme bien fatigué, quand y a fini s’journé,
In rintrant à s’mason y drot s’mett’ à r’lavé.
Y dit : Quoiche que j’ta fait, qui n’a rien d’aprété ?
Tai-te j’ai un ma d’tiete, j’cros que j’va quervé.

QUATRIEME COUPLET

Ch’l’omme est bien continté, quan qu’eull’ a eu parlé
Y dit j’va faire tin lit pou un aute y couché.
Y dit : Adieu, nou fimme, je m’in va passé l’nuit,
Je m’in va, tache d’agir pour avoir des habits.

CINQUIEME COUPLET

Et tous les mercrédis, ch’est grand jour de marqué,
Mon vieux, va li d’mondé chin qui faut rapporté.
Oh ! ch’est un role bine jué pou povoir y intré.
Y n’peut poin s’impêché que d’y allé couché.

SIXIEME COUPLET

Alors par un biau jour, ch’lomme bien étonné,
Il a été surpris d’vir sin lit bien onté.
Chell’ couverte de laine duche que t’l’a accaté ?
Va, cros qu’des fimmes comme mi ne sont jamais géné.

SEPTIEME COUPLET

Ch’lomme s’a poin continté, savant poin qoi pinsé,
Y a volu savoir duche quel l’avo accaté.
Cha poin été sans ma m’n’homm’ que je l’ai gagné,
J’l’ai laiché fair’ à s’mode, ch’est-là l’don qui m’a fait.

HUITIEME COUPLET

Ah ! dit un peu mes frères comm’ nous somm’ aringé,
Vète un peu nou graissié tout chin qui gnia d’marqué.
Ichi n’demi-poté, là eune onche de café,
Quan que l’sim’di s’ra v’nu on n’pora pu payé.

NEUVIEME COUPLET

On vot des comarates qui sont bien rafalé,
Tout d’puis qui sont marié n’vont pu au cabaré.
Y n’gau’te poin assé pou payé l’boulingé,
D’leux fimmes les d’mi-poté et les tasses de café.

DIXIEME COUPLET

On peut vous assuré, putot qu’de marié,
J’peu vou juré, mes gins, j’aime mieux ète prisonné.
On vot des biels eximples sur cheus qui sont marié,
Les tros quarts de chés hommes porte l’corn au boné.

REFRAIN

Accouté, mes amis, ch’est l’habitude du pays, (bis).
Mes amis, ch’est bien vrai, ne vous marié jamais.