" MIZTECH S. L. I. "

PREMIER COUPLET

J’attinds souvint raconter
L’bonheur du mariache,
L’pauve, l’riche, l’sot et l’sache
N’faitent que s’in vinter ;
Pourtant, je n’trouve point cha.
J’min vas min compère,
T’raconter quèques misères
De ch’biau état là ;
Sus tout chin que j’te vas dire,
J’cros fort que te vas in rire ;
Crac,
Qu’in s’marie bien ou mal,
L’mariache ch’est un bacchanal,
Qu’in s’marie bien ou mal,
Ch’est un bacchanal.

DEUXIEME COUPLET

Quand te bos trop d’jus d’houblon,
Eut’ femme all’ t’inf’nouille,
Et dins t’ribotte te l’rondouille
A grands cops d’ramon.
Souvint, pou se r’vinger,
Al’ te fiche à l’ tiète
Ses queyerres, s’vaclette,
S’caf’tière, t’in minger ;
Quand te vot qu’all’ t’intortille,
Comme deux quiens dogues te batille.
Crac,
T’as biau faire, ch’est égal,
Ch’est t’ femme qui fait bacchanal,
T’as biau faire c’h’est égal,
Al’ fait bacchanal.

TROISIEME COUPLET

Souvint, quant t’a bien ouvré
Tout l’ long de l’ semaine,
Te pinse que t’aras pou t’peine
Quèques pintes à vidier.
Pour ti, pu d’cabaret,
L’s infants ch’est t’n affaire,
Pou les impêcher d’ braire,
Berche les tout l’ soirée ;
Ch’est là, quand un les dodine,
Qu’un dot faire eun’ drôle de mine,
Crac,
Et si te fait l’brutal,
Eut’ femme al’ fait bacchanal,
Et si te fait l’brutal,
Al’ fait bacchanal.

QUATRIEME COUPLET

Si te n’paie point loyer,
Tin propriétaire,
Vient t’ trouver in colère
Pou te l’ faire payer.
Si te dis qu’ t’as point d’ sous,
Ch’est enn’ aute affaire,
Sans r’vettier t’ misère
I t’ met sens d’sus d’sous,
Y démonte porte et ferniette,
T’as biau braire et t’ casser l’ tiête,
Crac,
Te peut t’ plainte, ch’est égal,
Sans sous y f’ra bacchanal,
Te peut t’ plainte, ch’est égal,
Y f’ra bacchanal.

CINQUIEME COUPLET

Ch’ n’est pont tout l’désagrémint
D’ête à sin ménage,
Te cros souvint t’femme bien sage,
Mais ch’est autermint ;
Aveue des vieux darons
Elle fait ripette,
Souvint l’homme est si biète,
Qui gobe l’bouillon ;
Mais comme y vot tôt ou tard
Que s’ femme ell’ le fait cornard,
Crac,
Ch’est l’ déroute générale,
L’homme et l’ femme font bacchanal,
Ch’est l’ déroute général,
Y font bacchanal.

SIXIEME COUPLET

J’ connos des femmes pir’ que cha,
Ch’est le splus maflantes,
Te diros des p’lottes guillantes,
Molles comme du mout d’ cat ;
Ch’est toudis du nouviau,
Eul grippe, eul migraine,
Les mas d’ tiête et d’ poitrine,
Lav’mints et cauds d’iau,
L’ médecin et l’apothicaire
Aveuc euss font d’ bonnes affaires.
Crac,
V’la l’ bonheur conjugal,
Là d’sus, fajons bacchanal,
V’là l’ bonheur conjugal,
Faijons bacchanal.

SEPTIEME COUPLET

Enfin, compère, ch’est point tout,
Y a des ménagères,
Aveuc leus langues de vipères
Qui fait’nt d’ biaux coups.
Te n’porot point vraimint
Fraiquir tes maronnes,
Sans qu’au moins chint personnes
N’in ritent l’ lendemain ;
Tout l’ jour on grossit l’ nouvielle,
L’ soir t’a piché eun’ rondielle.
Crac,
D’ ches femmes y n’ d’a point mal
Qui faitent ch’ biau bacchanal,
D’ ches femmes y n’ d’a point mal
Qui font bacchanal.

HUITIEME COUPLET

Compère, j’ cros qu’ t’a raison,
Ch’est drôle eul mariage
Et vraimint j’ cros que l’ pus sage
Ch’est d’ rester garchon ;
Mais dijons l’ vérité,
Ch’ n’est point tous les mêmes,
Y a gramint pus d’ braves femmes
Que cheuss’ que t’ m’a conté,
Te verra, te suivra l’ mote,
Te t’ marira comme un aute.
Crac,
Mais comme ch’est l’ carnaval,
Compère, faijons bacchanal,
Mais comme ch’est l’ carnaval,
Faijons bacchanal.